ದಿಬ್ಬಣ

ನೀ ಮುಂಗುರುಳ ಸರಿಸಿ
ನನ್ನನ್ನೂ ಉರುಳಿಸಿ..
ಗರಿಗೆದರಿಸಿದೆ ಹೃದಯದಲ್ಲಿ
ಭಾವನೆಗಳ ದಿಬ್ಬಣ
ಕೂಚು, ನಗಾರಿ, ಕಹಳೆ, ಹಲಗೆ ಹೊರಟಿವೆ ಹೊತ್ತು
ನೀಡಲು ನಿನಗೆ ಪ್ರಪ್ರಥಮ ಆಮಂತ್ರಣ

ಕೆನ್ನೆಗೆ ಅರಶಿಣ ವರಸಿ
ಹಣೆಗೆ ಕುಂಕುಮ ಮುಡಿಸಿ
ಹದಿನೆಂಟು ಮೊಳ ಸೀರೆ ಹೆಗಲಿಗೆ ಹೇರಿಸಿ
ಮನತುಂಬಿ ಹರಸಿ
ಮನೆತುಂಬಲು ಕೋರುತಿವೆ ಸುಸ್ವಾಗತ

ಚಪ್ಪರವ ಹಾಕಿಸಿ
ಮದರಂಗಿ ಬರೆಸಿ
ಮೇಳವನ್ನು ಕರೆಸಿ
ರಂಗೋಲಿ ಹೊಸೆಯಿಸಿ
ಹಸೆಮಣೆಯಲ್ಲಿ ಕೂರಿಸಿ
ತಾಂಬೂಲ ಇರಿಸಿ
ಗಟ್ಟಿಮೇಳದ ಘೋಷಕೆ
ಕಟ್ಟುತ್ತಿವೆ ಕಂಕಣ